Ümummilli Lider Heydər Əliyev 10 may 1923-cü ildə Naxçıvan şəhərində anadan olmuşdur. Sadə ailədə dünyaya gəlməsinə baxmayaraq, o, gənc yaşlarından böyük iradə, zəhmətkeşlik və liderlik keyfiyyətləri ilə seçilmişdir. Təhsil aldığı dövrdə dövlət idarəçiliyinə marağı artmış, bu sahədə fəaliyyət göstərmək üçün ciddi hazırlıq keçmişdir.
1969-cu ildə Azərbaycan SSR-in rəhbərliyinə gələn Ulu öndər Heydər Əliyev qısa müddətdə ölkədə köklü islahatlara start verdi. O dövrdə Azərbaycan iqtisadi və sosial baxımdan geridə qalmış respublikalardan biri hesab olunurdu. Lakin onun uzaqgörən siyasəti nəticəsində respublika sürətlə inkişaf edən sənaye və kənd təsərrüfatı mərkəzinə çevrildi.
Ümummilli Lider Heydər Əliyevin rəhbərliyi altında sənaye müəssisələri tikildi, neft-kimya sənayesi inkişaf etdirildi, kənd təsərrüfatında məhsuldarlıq artırıldı. O, xüsusilə milli kadrların hazırlanmasına böyük önəm verirdi. Minlərlə azərbaycanlı gəncin SSRİ-nin nüfuzlu ali məktəblərində təhsil almasına şərait yaradıldı. Bu addım gələcəkdə müstəqil Azərbaycanın peşəkar kadr potensialının formalaşmasında mühüm rol oynadı.
Eyni zamanda, Heydər Əliyev Azərbaycan mədəniyyətinin və dilinin qorunması istiqamətində də mühüm işlər gördü. Sovet ideologiyasının hökm sürdüyü bir dövrdə milli kimliyin qorunması və inkişaf etdirilməsi onun siyasətinin əsas istiqamətlərindən biri idi.
Azərbaycan 1991-ci ildə müstəqilliyini bərpa etdikdən sonra ölkə ciddi siyasi və iqtisadi böhranla üzləşdi. Daxili çəkişmələr, idarəetmə böhranı və Dağlıq Qarabağ münaqişəsi dövlətçiliyin gələcəyini təhlükə altına almışdı. Belə mürəkkəb bir zamanda xalqın tələbi ilə Ulu Öndər Heydər Əliyev yenidən hakimiyyətə qayıtdı. 1993-cü ildə onun ölkə rəhbərliyinə gəlməsi Azərbaycan tarixində dönüş nöqtəsi oldu. Qısa müddətdə siyasi sabitlik təmin edildi, dövlət institutları formalaşdırıldı və vətəndaş qarşıdurmasının qarşısı alındı. Ulu Öndər Heydər Əliyev hüquqi dövlət quruculuğu istiqamətində mühüm addımlar ataraq Azərbaycan Respublikasının Konstitusiyasının qəbuluna nail oldu.
Ümummilli Lider Heydər Əliyevin həyata keçirdiyi iqtisadi siyasətin əsasını enerji strategiyası təşkil edirdi. 1994-cü ildə imzalanmış Əsrin müqaviləsi Azərbaycanın dünya iqtisadiyyatına inteqrasiyasının əsasını qoydu. Bu müqavilə ölkəyə böyük həcmdə xarici investisiyaların cəlb olunmasına və iqtisadi inkişafın sürətlənməsinə səbəb oldu. Onun təşəbbüsü ilə həyata keçirilən enerji layihələri Azərbaycanı regionun strateji enerji mərkəzinə çevirdi. Bununla yanaşı, balanslaşdırılmış xarici siyasət kursu sayəsində ölkə beynəlxalq aləmdə etibarlı tərəfdaş kimi tanındı.
Ulu Öndərin Heydər Əliyevin siyasi irsinin əsas sütunlarından biri də azərbaycançılıq ideologiyasıdır. O, milli birliyi, dövlətçilik dəyərlərini və vətəndaş həmrəyliyini ön plana çəkərək güclü dövlətin formalaşmasına nail oldu. Onun siyasəti nəticəsində Azərbaycan yalnız iqtisadi baxımdan deyil, həm də siyasi və mənəvi cəhətdən gücləndi.
2003-cü ildə Ulu Öndər Heydər Əliyevin vəfatından sonra onun müəyyən etdiyi siyasi kurs bu gün dəcənab Prezident İlham Əliyev tərəfindən uğurla davam etdirilir. Müasir Azərbaycan onun qoyduğu möhkəm təməllər üzərində inkişaf edərək regionun lider dövlətlərindən birinə çevrilmişdir.
Heydər Əliyevin həyatı və fəaliyyəti Azərbaycan xalqının yaddaşında əbədi yaşayacaq bir dövlətçilik məktəbidir. Onun uzaqgörən siyasəti, qətiyyəti və milli maraqlara sadiqliyi nəticəsində Azərbaycan müstəqilliyini qoruyub saxlamış və inkişaf yoluna çıxmışdır. Ulu Öndərin doğum günü yalnız bir tarixi gün deyil, həm də müasir Azərbaycanın formalaşmasının rəmzi kimi qeyd olunur.
Azərbaycan xalqı bu gün ulu öndərin əziz xatirəsini yad edir.